| Kurzgeschichten > Humor |
 |
|
D Erinnerige verwüsche sech
von Marc P Sahli >>
D´Erinnerige verwüsche sich, das wird eim are Klassezämekunft schmärzlech bewusst. „Iih, du gäu, das isch guet 30 Jahr här“, seit d´Ariane zum Susi mit em Bier ir Hang vorem Alphütt-li. S´Susi nippet nume amene Mineralwasser, es ma hüt afe nümm verlyde, auso äs scho, aber d´Tschugger sy chly stieri Sieche, we sie eim verwütsche, de bisch dr Lappe grad los. „Du“, seit s´Susi u stüpft d´Ariane i d´Syte. „Lue dert, wär chunnt da, ischs d´Corinne, nei, d´Claudia, oder wie heisst sie nume? Ou, isch das pynlech, ig weiss das nümme. Aber grauet het sie, gäu, u feiss worde isch sie ou. Sie wird äuä mänge Goof ha.“ „Aaah, Carla, i ha di fasch nümme gchennt, guet gsesch us, s´ Grau steit dir no.“ D´Luft isch läy, d´Sunne schynt, i de Matte blüeit d´Alpflora. D´Buebe stöh vorem Füür mit em Bier ir Hang, auso weniger Buebe, sie sy ja nümm 16, sondern gstandni Manne mit Bierränze und Gledene, fasch aui ghürate, gschiede, Ching und Höchs, Töifs und Dramene vo ihrer bourgeoise Existänz. Dr Küsu zeigt am Mänu wie starch är no syg u hout ihm us Versehen e Flute. Das het du am Pesche nid passt u gryft dr Küsu a, was zum Glück d´Cloudia cha deeskaliere u drzwüsche geit. Jaja, auti ygfrorni Konflikt bräche wieder us. Sie sy nume bygleit, wüu me vor 29 Jahr uf ei Chlapf die glychi Schuel verlaah het u aui angeri Wäge gange sy. Nume darum. Aber äbe, zum Glück verwüsche sech Erinnerige. Dr Märcu isch ämu z´gäggus ar Zämekunft, är het aui Erinnerige a die Zyt verlore, oder gseht´s nume so us? Är het offebar chönne vergä, was ihm aues passiert isch, är het ja am meischte unge düre müesse, dänkt s´Cloudia, luegt i ds Lääre dür s´Füür düre u süfzget. |
|
|
Seite
von 2 |
|
|
| Kommentare (1) |
|
